Sanpedroetako lehen eguna amaitzeko, kontzertuak izan ziren atzo Moilan: Min, Indigø eta Belako taldeek girotu zuten iluntzea. Euria egin bazuen ere, hainbat herritarrek hasieratik amaierara jarraitu zituzten emanaldiak.

Goizean mendi buelta, arratsaldean karta jokoak eta toka, eta iluntzean herri afaria eta dantzaldia; atzokoa ere egun bete-betea izan zuten Beizaman. Festen erdi parera iritsi dira dagoeneko, baina oraindik beste bi egun dituzte aurretik. Gaur, eguerdira bitartean, pilota partidak eta artisauen azoka izango dira; eta arratsaldean, herri kirol erakustaldia.