Albistegia

Narrondotik Arroagoira doan bidegorri zatia erabilgarri dago jada. Arroagoia eta Iraeta lotuko dituen azken zatia falta da Zumaia eta Zumarraga arteko bidegorriaren 47 kilometroko ibilbidea osatzeko. Datozen asteetan hasiko dituzte azken zati horretako lanak. 

Gaur goizean hasi dute Izarraizpe Open izeneko speedcubing txapelketa Azpeitiko Izarraizpe ikastola publikoan. Euskalcubing elkarteak eta Espainiako Speedcubing Elkarteak antolatu dute lehia, Mikel Manterola eta Ruben Lopez buru direla. Txapelketa gaur hasi badute ere, bihar ere izango du jarraipena; izan ere, igande arratsaldean jokatuko dituzte finalak. Guztira, 40 bat lagun ari dira txapelketan parte hartzen, eta horietako asko urrutitik etorri dira: Frantziatik, Portugaldik eta Espainiako hainbat txokotatik, besteak beste. Euskal hiztunak diren partaide batzuekin eta Mikel Manterola antolatzailearekin hitz egin du Gukak, txapelketaren nondik norakoak hobeto ezagutzeko.

Saharako 21 haur etorri dira Urola Kostara uda igarotzera; 11 harrera familietan daude, eta hamar Azpeitiko Ikasberrin atondu duten Bakeleku udalekuan.

2027ko San Sebastian bezperako danborradak itxura berria hartuko du. Ibilbidea mantenduko du, ez du geldialdirik egingo parrokian eta gauerdian danbor taldeak bi multzotan zatituko dira, hogeita lau plazan eta hamabi parrokian. Askotariko iritziak eragin dituzte plazako espazio faltari erantzuteko prozesuak nahiz hartutako erabakiek. Esaerak dioten bezala, zenbat buru, hainbat aburu. Horietako batzuk bildu ditu Gukak bideo honetan.

Nabigazio tradizionaleko nazioarteko topaketa garrantzitsuenetakoa hasiko da astelehenean Danimarkan, eta Euskal Herriak, azken hamar urtean aurreneko aldiz, ontzi eta tripulazio propioa izango ditu txapelketan. 

Besteak beste, pilota jaialdiak, meza eta artisauen azoka izan dituzte gaur goizean Beizaman, sanpedroetako hirugarren egunean. Arratsaldean, berriz, herri kirol saioa izango da plazan, 19:00etan hasita. 

San Pelaio Bigarrenean ohitura den moduan, oilasko biltzera joan dira herritar ugari. Aurten dantzari ugari animatu da urteroko ekitaldira eta, txistulari zein trikitilariez lagunduta, inguruko baserri zein bazterrak alaitzen ibili dira.

San Pelaio egunarekin batera, iritsi da aurtengo balsa karrera ere. Aurten, Munoako obrak direla eta, txosnagunea ohiko lekutik at badago ere, urteroko ibilbidea mantentzea erabaki dute antolatzaileek. Bederatzi balsetako partaideek beroari aurre egiteko modu bikaina aurkitu dute.

Eguerdian hasi dituzte San Pelaio jaiak zarauztarrek. Lege Zaharren Enparantza jendez gainezka zegoela bota dute txupina Haurren Agerraldiko kideek, 12:00etan puntuan. Telmo Esnaola izango da bertako Zuzendari Nagusia. Arratsaldeko danborradarako "urduri" dagoela aitortu du Esnaolak, baina baita "ilusioz gainezka" ere, ez baitzuen espero bera aukeratuko zutenik Zuzendari Nagusi.

Gauerdian sartu dute lizarra Urrestillako plazan, eta sanjoanetan bete-betean murgildu dira hango herritarrak. Beroa bai, baina festarako gogoak lagundu du aitzakia hori alboratzen. 

Saharar herriaren alde azken urteetan egiten duen lana eta erakutsi duen konpromisoa aitortu zizkion udalak Darahli elkarteari. Leire eta Irati Lizarralde ahizpek piztu zuten sua, Saharako bi emakumerekin eta udal ordezkariekin batera. 

Gazte talde batek sanpedroetako danborrada "berreskuratu" du, eta herriko kaleak hartuko dituzte ostiral honetan, Orioko txarangarekin batera. Entseatzen igaro dute azken hilabetea, eta dagoeneko dena prest dute gau handirako. 40 bat pertsonek eman dute izena hitzorduan, eta oraindik danborradan ateratzeko gogoa dutenek, horretarako aukera izango dute ostiral iluntzean.