UEMAk deituta ia 100 udal eta milaka herritar atera dira gaur eguerdian kalera, Espainiako Auzitegi Gorenaren azken epaia salatzera eta euskararentzat justizia eskatzera. Urola Kostan, Aian izan ezik gainerako herri guztietan egin dituzte bilkurak UEMAk eta herri horietako udalek deituta. Hainbat eragilek ere bat egin dute gaurko aldarriarekin.

Espainiako Auzitegi Gorenak EAEko Udal Legearen hainbat artikulu atzera bota ditu. Ondorioz, euskarak lehentasuna galduko du Araba, Bizkai eta Gipuzkoako administrazio publikoetan. UEMAk irmoki salatu du epaia, eta euskara lehenesten jarraituko duela ziurtatu du. Elkarretaratzeak deitu ditu zapaturako, mankomunitateko kide diren udalerrietako udaletxeen aurrean.