Itasua IATko langileek manifestazioa egin zuten atzo arratsaldean, greba mugagabearen 83. egunean. Lege Zaharren Enparantzan bildu ziren 19:00etan, Borroka da bide bakarra! lelopean, eta langileek enpresari negoziazio mahaian benetako akordio bat lortzeko borondatea izatea, eta Eusko Jaurlaritzari gatazkan esku hartzeko eskatu zioten. "Gaur Itasua IATko langileok, gure aldarrikapena Zarauzko kaleetara zabaltzea erabaki dugu", adierazi zuten.
Beharginek azaldu zutenez, aste honetan enpresarekin egindako bileretan ez dute "jarrera aldaketa nabarmenik" ikusi. Hala ere, negoziazioa berriro bideratzeko aukera badagoela adierazi zuten: "Oraindik garaiz dago gatazka honi konponbidea jartzeko". Nolanahi ere, ez direla "edozein akordiorekin konformatuko" ohartarazi zuten.
Azkenik, Eusko Jaurlaritzari ere gatazkan duen erantzukizuna bere gain hartzeko eskatu zioten, bereziki Industria Sailari. Beharginen hitzetan, Industria Saila "ez-ikusiarenak egiten ari da gatazka hasi zenetik". Langileek adierazi zuten greban jarraituko dutela "merezi ditugun lan baldintzak bermatuko dituen hitzarmena lortu arte".