Jose Luis Kortak arrauna utziko duela iragarri du aste honetan. Castroko entrenatzailea izan da azken bi urteetan, eta liga oraindik amaitu ez den arren, erabaki hori hartu du 76 urteko oriotarrak. "Bazen garaia, ezta?", esan dio Gukari, umoretsu. Taldea KAE1 ligan lehiatu da, baina maila galdu dute espainiarrek, "azken unera arte borrokatu dugun arren", azpimarratu du Kortak. "Maiatzean tripulaziorik gabe ginen, eta ahal duguna egin dugu", nabarmendu du. Castro baino lehen Kaiku entrenatzen aritu zen, eta kontatu du berez orduan utzi nahi zuela arrauna. "Entrenatzailea ere neuk aurkitu nien, baina gero Castroko presidenteak deitu zidan laguntza eske, esanez bi urte gelditzen zitzaizkiola zuzendaritzan eta ea lagunduko nien, eta horregatik hartu nuen taldea", azaldu du.
Arraunaren egoeraz berehala egin du hausnarketa, "beheraka" doala esanez eta aldaketak datozela iragarriz. "Oriok edukiko du munduko harrobi onena, baina berak ere fitxaketak egin behar izan ditu lehiekaetak irabazi ahal izateko. Futbolean bezala ari da gertatzen; dirua jarri behar da irabazteko". Horrek berak harrobiak ahultzea dakarrela uste du, ordea: "Fitxaketek etxeko gazteei kentzen diete tokia, eta horrek eragin dezake gazteek arraunean jarraitu nahi ez izatea".
Kortak badaki zer den Kontxako banderak irabaztea, hainbat garaipen baititu poltsikoan arraunlari gisa nahiz entrenatzaile gisa –horietako batzuk Oriorekin– eta aurtengo hitzorduaren atarian, ez du zalantzarik: "[Gizonezkoetan] Oriok irabaziko du Kontxa, kristoren kuadrilla du eta". Estropadak ikusten Donostian izango den galdetuta, ezetz dio, oporretara doala.
