Lau hamarkada baino gehiago Cabo Verden deportatuta daramatzan Antton Olaizola zestoarraren herriratzea aldarrikatuko dute beste urte batez Ama Birjina jaietan. Ostiralerako deitu du elkarretaratzea Antton Ao Povo! herri ekimenak. 19:00etan egingo dute, plazan.
Horrez gainera, Antton Ao Povo! ekimenak eta Sarek jantokia irekiko dute festetan Gestoria-Kutxa parean, azken urteetan egin duten bezala. Larunbat honetan nahiz irailaren 5ean eta 6an ogitartekoak salduko dituzte bertan, eta mahaiak eta aulkiak ere jarriko dituzte bertan afaldu ahal izateko. 19:30etik 23:00ak arte eskainiko dute zerbitzua.
Bestalde, larunbateko Gazte Eguneko bazkaria antolatu du Antton Ao Povo! plataformak, Otordurako txartelak salgai daude dagoeneko Portale eta Koiote tabernetan. Txartelak 25 eurotan eskura daitezke, baina ikasleek nahiz langabeek hamabost eurotan erosi ahal izango dituzte horiek.