Ama Birjina festen azken apurretan daude Zestoan. Umeen Eguna da gaur, eta txikienak izango dira protagonistak gauera bitarte. Urtero bezala, seigarren maila bukatu duten ikasleek bota dute Umeen Eguneko suziria, eta jaiak ondo amaitzeko deia egin ostean, plazara atera dira hainbat dantza eskaintzera; tartean Zestoan horren ezaguna den zahagi dantza eskaini dute, plazan elkartu diren herritarren begiradapean. Gainera, hurrengo urtean dantza hori eskainiko dutenei dantzaurrea egin diete, lekukoa ematearen adierazgarri.
Dantzako lanak amaituta, gozatzen jarraitu dute gaztetxoek; batzuk, gainera, buruhandi lanetara ere animatu dira. Eguneko goizak utzi dituen irudiak eta adierazpenak jaso ditu GUKAk bideoan. Arratsaldean jarraituko du jaiak, eta 22:30ean amaituko dira 2024ko amabirjinak, suzko zezenarekin.
Argazki bilduma, hemen.
