Juan Paredes Txiki zarauztarra eta Angel Otaegi azpeitiarra duela 50 urte fusilatu zituen Francoren erregimenak, atzoko egunez. Gaur, Zarauzko herriak omenaldia egin nahi izan dio Txikiri eta haren senideei: 1975 herri ikuskizun ibiltaria aurkeztu dute eguerdian, Txikiren bizitza oinarri duen kontakizuna.
Ehundik gora lagunek parte hartu dute antzezlanean, tartean, bertsolariek, idazleek eta margolariek. Urte hartako hainbat une irudikatu dituzte herriko txoko ezberdinetan: hala nola Txiki eta haren familia Zarautzera iritsi zeneko unea, Arantza Arruti militante eta abertzale feministaren aurkako Burgosko (Espainia) epaiketa, Txikiren fusilamendua eta gertatutakoa salatzeko herritarrek egindako manifestazioa.