Ia gauerdira arte izan zen festa atzo, San Joan bezpera, Orion. San Joan su txikiarekin konformatu behar izan zuten herritarrek, euria zela eta pergolan egin zelako ospakizuna, baina trukean, ikuskizun handia eskaini zuten Harribil dantza taldeko kideek. Jo eta ke aritu ziren suaren bueltan dantzan, eta bat baino gehiago gelditu zen eromen eder hartan parte hartzeko gogoz. Izan ere, pieza bizi-biziekin astindu zituzten hankak, askotariko koreografiak eskainiz.
Dantzari txikiei dagokienez, ohi bezala sorginez jantzita atera ziren kalera– 100 inguru– eta kalejirarik egon ez zen arren, oihuka egin zituzten Kosta Tailerretik plazarako bidea nahiz plazatik pergolara artekoa.
Xixario paretik plazara egin zuten kalejira txiki bat trikitilariek lagunduta, eta jendez lepo betetako plazan hainbat dantza eskaini zituzten. Ondoren, baita pergolan ere, suaren bueltan.
Euria euri, urteko gaurik magikoena izan zen atzokoa askorentzat.