Bart gaua begirik bildu gabe eta Herniora begira pasatu dute errezildar askok eta askok, atzo arratsaldean piztutako suteari adi. Larrialdi zerbitzuek 19:30ak aldera jaso zuten Hernioren magalean sua piztu zela zioen abisua, eta berehala bertaratu ziren Azpeitiko eta beste hiru suhiltzaile parketako hogeita hamarren bat kide.
Bi foku zituen suak, ia aldi berean piztutakoak biak, 200 bat metroko tartearekin: bat Zelatundik gertu, eta bestea Trintxeratik Zelatunera bidean goiko aldera, Hernioko tontor aldera. Zelandutik hurbilen zegoen fokua nahiko azkar hartu zuten mendean, baina Hernioko tontor aldera zegoena itzaltzea nekezagoa izan zaie, haize zakarra zebilelako eta lekua bera ez delako iristeko erraza. Hura ere kontrolatzea lortu dute azkenean, eta 05:30ak alderako itzali dute sua. Ordu horretan alde egin dute hainbat suhiltzaile kamioik, baina oraindik ere ingurua zaintzen ari dira brigadako langileak eta baita helikoptero bat ere.
Sutea izan den lekuan ez da etxerik, eta zauriturik ere ez da izan. Koldo Arzallus Errezilgo alkatearen arabera, otea da erre den guztia. Sua nola piztu zen, hori da orain ikerketzeko gelditzen dena.
Gainera, Herniokoa ez da izan bart gaueko mendiko sute bakarra Gipuzkoan. Izan ere, suhiltzaileak hangoa itzaltzeko lanetan ari zirela, 01:00ak aldera, beste bat piztu da Izazpin. Gailurretik oso gertu piztu da han ere, Ezkioko aldean dagoen otadian, eta ondoren, Zumarraga eta Azpeitia aldera zabaldu da sua. Suhiltzaileak gau guztian jardun dira lanean, eta dagoeneko lortu dute hura itzaltzea ere. Han ere ez da inor zauritu.
