Gau zaila izan da Gipuzkoako suhiltzaileentzat, aldi berean mendiko bi suteri aurre egitea egokitu baitzaie. Aurrenekoa atzo arratsaldean piztu zen Hernion, eta bigarrena, goizaldean piztu da Izazpin. Goizerako, baina, biak mendean hartzea ez ezik, itzaltzea ere lortu dute. Oraindik ere bi eremuetan zaintza lanetan ari dira suhiltzaileak, badaezpada ere. Inor ez da zauritu eta kaltetutako etxebizitzarik ere ez da izan; otea da erre den guztia. Sua nola piztu zen argitzea gelditzen da orain.
Larrialdi zerbitzuek 19:30ean izan zuten Hernioren magalean piztu zen sutearen berri, eta poliziaren iturriek adierazi zuten suteak bi foku nagusi zituela basoan. Errezilgo Udalaren iturrien arabera, fokuetako bat Trintxeratik Zelatunera doan bidearen goiko aldera zegoen, Herniko tontor aldera, eta bestea Zelatun inguruan. Hainbat iturriren arabera, biak ia aldi berean piztu ziren.
Azpeitiko, Tolosako eta beste bi parketako suhiltzaileak aritu dira sua itzaltzeko lanetan. Zelatundik gertueneko fokua nahiko azkar hartu dute mendean, baina gehiago kostatu zaie Hernio aldera zegoena kontrolpean izatea, haize zakarra ibili delako eta lekua bera ez delako horren irisgarria. 05:30ak alderako, baina, menderatu dute sua. Goizean, artean, hainbat suhiltzailek han jarraitzen dute zaintza lanetan, eta helikoptero bat ere han dabil, baina ez da surik ageri.
Koldo Arzallus Errezilgo alkateak adierazi duenez, sutea izan den lekuan ez dago etxebizitzarik eta zauriturik ere ez da izan; otea da erre den guztia. Sua nola piztu zen, hori da orain ikertzeko gelditzen dena.
Suhiltzaileak Hernioko sutea itzaltzeko lanetan buru-belarri ari zirela, baina, Izazpin ere sua piztu da goizaldean, 01:00ak aldera hain justu. Gailurretik oso gertu piztu da han ere, Ezkioko aldean dagoen otadian, eta ondoren, Zumarraga eta Azpeitia aldera zabaldu da sua. Suhiltzaileak gau guztian jardun dira lanean, eta dagoeneko lortu dute hura itzaltzea ere. Hamabost hektarea erre dira, baina han ere ez da inor zauritu.