San Martin eguna astelehenean, hilak 11, ospatuko badute ere, hasi dituzte festak Errezilen. Gaur, ostirala, bota dute jaiei ekiteko txupinazoa udaletxeko balkoitik, eta hala, bide eman diote sei jai eguneko festa egitarauari. Aurten, San Martin Herri Eskolan urtez luzez irakasle lanetan aritu eta egun erretiratuta dauden Mertxe Egiguren eta Antton Garro irakasle ohiak arduratu dira jaiari hasiera emateko txupinazoaz.
Eskola ordua amaitu bezain pronto, korrika batean igo dira udaletxe aurrera haurrak eta haien etxekoak, musikak eta eskuz egindako erraldoiek nahiz buruhandiek lagunduta. Han itxaron diete Egigureni eta Garrori guztiek, eta adi-adi entzun dituzte txupinazoa bota aurretik irakasleek balkoitik esan dituzten hitzak. Bikoteak azaldu du "ohorea" dela Errezilgo jaiei hasiera emateko txupinazoa botatzea, "oso-oso gustura" hartu dutela proposamena. "Urte askoan egin dugu hemen lan, eta etxean bezala sentitu gara. Herri txiki honetan bihotz handi-handiak ikusi ditugu; oso gustura ibili gara. Orain, festa ederrak opa dizkizuegu. Denentzat izan daitezela jaiak, errespetuan oinarrituak. Ondo-ondo pasatu", adierazi dute bi lagunek.
Suziriak piztu aurretik, "gora Errezil!" oihukatu dute eta modu berean erantzun diete behetik herritarrek. Txalo artean hartu dituzte gero irakasleak, eta Garrok segidan piztu ditu bost suziriak. Udaletxetik plazara jaitsi dira segidan bi protagonistak, eta haurrek zein horien etxekoek maitasun handiz agurtu dituzte, haien eredu diren seinale. Udaletxe aurretik elizako zimitoriora mugitu dira gero guztiak; izan ere, han txokolate beroa eta opilak eskaini dizkiete bildutako guztiei.
Festa hasi besterik ez da egin Errezilen, eta gaur ere izango da bestelako ekintzarik. 20:00etan, esaterako, gaztetxoen emanaldiak izango dira, eta 21:00etan, Errezil Bizirikeken eskutik herri afaria. Afalostea Obaneukek girotuko du, musika talde horrek ordu txikietara arteko erromeria eskainiko baitu. Erromeriaren atsedenaldietan, berriz, txinga txapelketa jokatuko dute.
Hona hemen aurtengo sanmartinetako egitaraua:
Larunbata, azaroak 9:
- 07:00. Gaupaseroen argazkia.
- 14:00. Bertso bazkaria Letea jatetxean. Bertsolariak: Nerea Elustondo eta Unai Agirre. Trikitilariak: Haritz Garmendia eta Eneko Arbeo.
- 16:30. Ume jolasak.
- 20:00. Sagardo eta pintxo dastaketa.
- 23:00. Gozategi.
- Ondoren, Naza DJa.
Igandea, azaroak 10:
- 11:00. Haurrentzako krosa.
- 14:00. Zahagi ardoa, zimitorioan.
- 17:30. Herritarren arteko kirol erronka.
- 19:00. Pintxo poteoa. Ondoren, bingoa Borondegin.
Astelehena, azaroak 11, San Martin eguna:
- 11:00. Meza nagusia. Ondoren, hamaiketakoa Borondegin.
- 16:30. Haurrentzako ekintzak.
- 19:00. Errautsak hauspotzen dokumentalaren emanaldia eta hitzaldia, Borondegin.
Asteartea, azaroak 12, Jubilatuen eguna:
- 13:00. Meza nagusia.
- 14:00. Jubilatuen bazkaria Borondegin, bertsolariekin eta trikitilariekin.
Azaroak 22, ostirala:
- 21:00. Bertso afaria Letea jatetxean. Bertsolariak: Sustrai Colina eta Aitor Mendiluze. Trikitilariak: Erkizi eta Manex Unanue.
