Aizarnazabalen prest daude datorren ostegun eta ostiralean Samiel Txikiko festei gogoz heltzeko. Ostegunean, San Miel Txiki Egunean, umeek krosa egingo dute 17:00etan eta, atzetik, txokolatadarekin berreskuratuko dituzte indarrak. Horrez gainera, 18:00etan, Aizarnazabalgo gaztetxoek aretoko futboleko partida jokatuko dute Errezilgoen kontra. Eta 18:30etik aurrera, aldiz, musikak hartuko du herria, JM Mendizabalek eskainiko duen dantzaldiarekin.
Ostiralean ere protagonismo berezia hartuko du kirolak. 18:00etatik aurrera, erremonte partidak jokatuko dira Atari Soro frontoian. Goikoetxea V.ak eta Eskuderok Aiestaran VII.a eta Apezetxea izango dituzte aurkari; Gurrutxagak eta Azpirozek, berriz, Segurolak eta Juanenek osatuko duten bikotearen kontra jokatuko dute.
21:00etan, halaber, bertso-afaria egingo dute Mikel Elkartean. Maialen Lujanbio eta Oihana Iguaran arituko dira kantuan.
Ostiralarekin, baina, ez da festa bukatuko Aizarnazabalen, Gazte Eguna ospatuko baitute larunbatean. Besteak beste, zoro-jolasak, bazkaria, bingo musikatua eta kontzertuak antolatu dituzte.
Bestalde, aurtengoan, Alaitsuren dantza saioa ez dute San Miel Txikiko festetan egingo, maiatzaren 16an, baizik, Euskaraldiaren baitan.