Lau auto eta kamioi baten arteko istripuak auto-ilara luzeak eragin dituzte gaur goizean AP-8 errepidean, Zestoa parean. Istripuan ez da zauriturik izan, baina eskumako erreiak itxita jarraitzen du, kamioia errepidetik ateratzen ari baitira.
Istripua 06:45 aldera gertatu da. Ertzaintzak jakinarazi duenez, goizeko lehen orduan autopistako bi erreiak itxi behar izan dituzte Bilboko noranzkoan, eta zortzi kilometroko auto-ilarak sortu dira, Zarautzeraino.
Ezbeharra izan duten lau autoak erretiratu ostean, ezkerreko erreia ireki dute, eta trafikoa zertxobait arindu du horrek; hala ere, oraindik ere ilarak daudela jakinarazi du Ertzaintzak. Kamioia erretiratzen eta errepidea garbitzen ari dira.