Arroabean ate joka dituzte karmenak, eta hango festa batzordeak zabaldu ditu otorduetarako izen-emateak ere. Izan ere, hilaren 18an, ostiralez, herri afaria egingo dute, eta biharamunean kuadrillen bazkariak hartuko du auzoa; baterako zein besterako izena eman daiteke hilaren 11ra bitartean, Txaran.
Hilaren 18an herri afaria egingo dute, eta bi menu izango dira aukeran: helduen menuan iberikoak, entsalada mistoa, baserriko oilaskoa, txerri saiheskia parrilan, Eceiza etxeko pasteltxoak, kafea eta kopa eskainiko dituzte 25 eurotan; umeenean, berriz, patea, urdaiazpiko kroketak, hanburgesa eta saltxitxak parrilan patatekin eta izozkia eskainiko dituzte 14 eurotan.
Hilaren 19an, berriz, kuadrillen bazkaria egingo dute, baina hori baino lehen paella lehiaketa hasiko da, 11:00etan. Bazkaltzen 14:00etan hasiko dira, honako menu honekin: entsalada eta paella, edaria, izozkia, kafea eta kopa. Helduek 15 euro ordainduko dute, eta umeek zortzi euro.