Zestoako Musika Bandak 115 urte betetzen ditu aurten. Ospatzea merezi duen urteurrena dela iritzita, urtean zehar ohikoak dituzten emanaldiei beste batzuk eranstea erabaki dute bandakideek, eta erabaki horren emaitza aurkeztu zuten atzo arratsaldean. Joseba Regil Bandaren batzordeko presidenteak, Ane Zulaika batzordekideak eta Beñat Etxabe zuzendariak, Jone Exposito Zestoako Udalaren Kultura zinegotzia ondoan zutela, eman zuten Zestoako Bandarentzat kutsu berezia izango duen urte bete-betearen berri, Kultur Etxeko aretoan egindako agerraldian.
Normalean urtean zehar bost kontzertu edo agerraldi nagusi egiten baditu –festetako kalejirak, Erregeen kabalkada edota danborradako parte hartzea zenbatu gabe–, aurten zortzi egingo ditu Zestoako Bandak, eta kopuru hori "azpimarratu" nahi izan zuen atzo Zulaikak. Zortzi horietatik zazpiren kartelak aurrean zituztela egin zuten bandakideek eta Kultura zinegotziak 2025eko Bandaren agenda betea aurkezteko agerraldia, baina zortzigarrenarena falta zen. "Hemen ez da azaltzen, baina Arroabean ere kontzertua emango dugu uztailean", azaldu zuen Zulaikak. Karmen jaien barruan egingo dute emanaldi hori, uztailaren 20an.
Hasiera, Elizondon
Bandaren urteroko hitzorduei 115. urteurrenaren haritik gehitu dizkioten horietako lehendabizikoa Zestoatik kanpo izango dute bandakideek. Datorren larunbatean, martxoaren 22an, Elizondora (Nafarroa) joango da Zestoako Musika Banda, hango bandarekin adostutako elkartrukearen lehen zatia gauzatzeko.
2023ko udan egin zuen antzeko beste elkartruke bat Zestoako Bandak; Avilako (Espainia) Piedrahitako bandakoak Zestoan izan ziren aurrena, eta Zestoakoek bisita itzuli zieten astebetera. Regilen hitzetan, duela bi urteko hura "ekimen polita eta aberasgarria" izan zen, eta 115. urteurrenaren haritik antzeko zerbait egitea interesgarria izan zitekeela pentsatu zuten. "Bandako kide batek bazuen Elizondoko Bandako zuzendariarekin harremana, eta elkartrukearena proposatu genien".
Aurten, joan-etorri laburragoarekin moldatzeko moduko elkartrukea izango dute Zestoakoek, "egokiagoa". Hala ere, momentuz, itzulerako elkartzeak, bi herrietako bandek Zestoan egingo dutenak, ez du datarik. Zapatuan Elizondon emango duten kontzertuari dagokionez, banda bakoitzak "ordu erdi inguruko" emanaldia egin ondoren, bi taldek "elkarrekin pare bat kantu" joz borobilduko dute agerraldia, Etxabek azaldu zuenez. Aurretik, goizean, kalejiran ibiliko dira bi bandak Elizondon.
Kontzertu berezia, etxekoekin
115. urteurrena ospatzeko hitzordu nagusia, baina, maiatzaren 30ean jarri du Zestoako Bandak. Egun horretan, herriko beste hainbat eragilerekin, oraingoz jakinarazi ez dituzten eta "sorpresa" gisara mantendu nahi dituzten gonbidatuekin eta udalaren laguntzarekin, kontzertu berezia emango du bandak herriko plazan, 20:00etan. Eguraldia aldeko ez badute, kiroldegi atariko estalpean egingo dute.
Herriko bertsolariak, txistulariak, dantza taldea, bandako gazteak, antzerki eskolakoak, eskolako haurrak, herritarrek osatutako koruak... Etxekoekin ospatuko du bandak aurtengo emanaldi bereziena, etxekoak oholtzan eta etxekoak ikus-entzule dituela. "Txistu alardeen" antzeko formatuarekin irudikatu du emanaldi hori Etxabek. Herritar eta talde asko tartean izanda, "koordinazio lana" izango da neketsuena: hilabete eta erdiko prestaketa behintzat eskatuko die maiatzaren 30eko kontzertuak, bandakideen kalkuluen arabera. Hala ere, gogotsu daude zita horretarako.
Etxeko aurrena, parrokian
Asteburu honetan Nafarroan jo ondoren, martxoko azken ostiralean, hilaren 28an, Zestoako parrokian eskainiko du kontzertua bandak. Musika klasikoa izango da 20:00etan hasiko den emanaldi horretan protagonista.
Martxoan urtero eman ohi du kontzertua bandak, baina izan ditu aldaketak urteroko hitzordu horrek, Etxabek atzo azaldu zuenez: "Kontzertu pedagogiko gisa egiten hasi ginen, eskolako ikasleekin batera ematen genuelako, baina badira pare bat urte ez dugula horrela egiten. Urteurrenaren aitzakian, urte berezi batean beste kontzertu berezi bat eskaintzeko aukera bat zen. Ez da ohikoa bandek musika klasikoa jotzea".
Filmen soinu banden kontzertua (ekainaren 27an, Euskal Herria plazatxoan, musika eskolakoekin batera), Ama Birjina egunekoa (irailaren 8an, Laranjadi plazan), aurten euskal musikari eskainiko dioten Santa Zezilia egunekoa (azaroaren 22an, udaletxe azpian) eta Gabon kontzertua (abenduaren 24an, parrokian, musika eskolakoekin batera). Ohiko lau emanaldi horiekin borobilduko du Zestoako Musika Bandak bete-betea eta aberatsa datorren 115. urteurreneko urtea.