Zestoako eta Piedrahitako (Avila, Espainia) musika banden arteko elkartrukearen lehen kapitulua hartu zuen atzo Zestoak. Piedrahitako bandak egindako gonbitari erantzunez antolatu dute bi bandek elkartrukea, eta Zestoan harrera bikaina egin zioten atzo ekimenari, euri arriskuak hasierako asmoak aldarazi arren.
Izan ere, Euskal Herria plazan, aire zabalean, egitekoa zen kontzertua parrokian egin zuten azkenean, baina ikus-entzulerik ez zen galdu bidean, eta betekada ederra hartu zuen elizak. Ikusmin handia sortu zuen kontzertuak, eta hori nabaritu zen baita emanaldiaren aurretik bi bandek egin zuten kalejiran ere; zestoarrak ez ezik, Piedrahitatik hango bandarekin etorritako jendea ere bazen atzo Zestoan. Kontzertuan, etxeko banda aritu zen aurrena, Piedrahitakoa ondoren, eta emanaldia borobiltzeko, bi bandetako kideak elkarrekin aritu ziren.
Zestoa-Piedrahita musika elkartrukea datorren astean osatuko dute, Zestoako Bandak Avilako herrira egingo duen bisitarekin.