Lagunartean eta eguraldi goxoak lagunduta, giro ederrean ospatu zuten joan den larunbatean Zestoa Eguna Urepelen (Nafarroa Beherea). Senidetutako bi herrien arteko elkartruke jardunaldien barruan, joan den ekainaren 15ean Zestoan ospatu zuten Urepele Egunaren trukekoa bizi izan zuten herenegun dozenaka lagunek.
Autobus bete zestoar joan zen larunbat goizean Urepelera; tartean ziren Itxaropenako dantzariak, txarangako musikariak edota artisauak eta lehen sektoreko ekoizleak, udal ordezkariekin batera. Dantzariek eta txarangakoek, hango musikariekin batera, ireki zuten goizeko egitaraua Urepelen, eta Zestoako artisauek eta ekoizleek goiz-eguerdi osoan martxan izan zen azokan parte hartu zuten. Agiro mendi klubak udalarekin batera antolatutako Zestoa-Urepele egitasmoaren azken etapan parte hartu zutenek, berriz, oinez egin zituzten Artesiaga eta Urepele arteko hamazazpi kilometroak.
Dozenaka lagun elkartu zituen bazkari herrikoia izan zen egunaren hitzordu jendetsuena. Aurretik zein ondoren, bertsotan aritu ziren Aitor Salegi eta Oskar Alberdi zestoarrak, Haira Aizpurua eta Amets Arzallus. Arratsaldean, pilotalekua izan zen Zestoa Egunaren topaleku nagusia, eta han ere aritu ziren bertsolariak. Esain-Uhalde eta Sasiain-Agirre bikoteek Aldude eta Zestoa arteko desafioa jokatu zuten, batetik; eta Urmeneta-Ladis Galartza eta Mikel Goñi-Pascual bikoteek profesional ohien arteko lehia eskaini zuten, ondoren. Iluntzean, Kontrabanda taldearen kontzertuak borobildu zuen festa eguna.
(Argazkiak: Zestoako Udala)