Gero eta gertuago daude Gabonak, eta herritarrak ez ezik, herria ere hasi da festa magikoetarako prestatzen. Hain justu ere, Gabonetako argien piztea egin zuten atzo, Musika Plazan.
Herritar ugari bildu zen kioskoaren aurrean, hotzari aurre egiteko eskularruak, berokiak eta txapelak jantzita. Atzoko protagonista nagusiak, ordea, Antoniano Kirol Elkartea izan zen: bertako kide diren Aitor Gonzalezek eta Javier Bravok izan zuten argiak pizteko ardura. Gainera, ez ziren bakarrik egon, elkarteko atleta gazteek lagundu baitzieten argiak pizteko botoiari ematen.
Xabier Txurruka alkateak nabarmendu zuen moduan, elkartean lan ugari egiten dute Gonzalezek eta Bravok urte osoan zehar, baina horrez gainera, Zarauzko San Silbestre lasterketako antolatzaileak dira, probaren sorreratik.
Halaber, hitzordua musikaz jantzi zuten Schola Cantorum koruko kideek, eta Hotz Zarautzek txokolate beroa banatu zuen, errefuxiatuei laguntzeko.