Aurten, lehen aldiz, eta Zarauzko Udaletik jasotako proposamen bati helduz, herriko lau ikastetxeak –Salbatore Mitxelena Ikastola, Orokieta, Antoniano eta La Salle– elkarrekin atera dira abestera Gabon egunez. Hasieran, ikastetxe bakoitzeko ikasle, irakasle eta gurasoak beraien aldetik aritu dira kantuan, baina 12:00etan bat egin dute Frontoi Txikin.
Abesti pare bat bertan abestu eta berehala, kalez kale abiatu da ehunka lagun herrigunean barna Gabon kantuak ahoan, giro ezin hobean. Frontoi Txikitik Kale Nagusia hartuta Musika Plaza iritsi dira, eta Zigordia kalea zeharkatu ondoren, Lege Zaharren Enparantzaran eman diote amaiera ekitaldiari.
