Datorren ostiralean, martxoaren 6an, banatuko dituzte IX. Landaola sariak Mendaroko (Gipuzkoa) San Agustin kulturgunean (12:00). Gipuzkoako landa garapenerako sei agentziek osatzen duten Landaola federazioak urtero ematen ditu landa garapeneko proiektuei errekonozimendua egin asmo dieten sariok, eta aurten ere lau sari emango dituzte: erakunde pribatuarena, erakunde publikoarena, ibilbidearena eta Emakumeak Landa Eremuan izenekoa.
Azken bi sailetako sarituen izenak ekitaldian bertan jakinaraziko dituzte aurten ere, baina erakunde pribatu zein publikoen sariak, urtero bezala, garapen agentziek aurkeztutako hautagaien artetik irtengo dira. Landaola osatzen duten sei eskualdetako agentziek hautagai bana aurkezten dute sariotarako, eta Urkomek baditu bere bi hautagaiak.
Ekimen pribatuko egitasmoen sarirako, Luzaro Errezilgo Azoka proiektua aurkeztu du Urola Kostako landa garapenerako agentziak, Amaia Alberdi azpeitiarrak Errezilgo Azokaren lekukoa hartuta martxan jarri duen proiektua, hain zuzen.
Erakunde publikoek sustatutako egitasmoen sarirako, berriz, Bizi Beizaman egitasmoa aukeratu du Urkomek, joan den udazkenean New European Bauhaus saria irabazi zuen proiektua.
Ostiralean jakingo da Urola Kostako hautagaiek saririk jaso duten ala ez.