Gaur arratsaldean hasiko du bidea 2024ko Gipuzkoako Bertsolari Txapelketak, Urretxuko Labeaga aretoan egingo duten final zortzierenetako aurreneko saioarekin. 17:00etan hasiko da kanporaketa, eta txapelketan parte hartuko duten eskualdeko hamar bertsolarietatik bat ariko da bertan: Jon Gurrutxaga azpeitiarra. Andoni Rekondo, Ane Zuazubiskar, Antton Aizpurua, Mikel Iturriotz eta Una Mendizabal izango dira harekin lehian.
Bihar, berriz, Lasarte-Oriako Manuel Lekuona kultur etxean jokatuko da kanporaketa, eta han eskualdeko beste hiru lehiatuko dira: Iñigo Mantzizidor Mantxi eta Aner Peritz Euzkitze zarauztarrak, eta Oier Etxeberria azpeitiarra. Horiekin hiru bertsolari ariko dira kanporaketan: Aitor Zubikarai, Amaia Iturriotz eta Manu Goiogana.
Saio guztietarako sarrerak salgai daude Bertsosarrerak.eus webgunean. Bertsozale Elkarteko bazkideek eta gazteek prezio berezia izango dute sarreretan. Txapelketaren saio guztiak, finala barne, 17:00etan hasiko dira.
48tik hamar eskualdekoak
48 parte hartzaileetatik hamar dira, esan bezala, txapelketan lehiatuko diren Urola Kostako bertsolariak: Eneritz Artetxe eta Unai Izagirre azkoitiarrak; Jon Gurrutxaga eta Oier Etxeberria azpeitiarrak; Libe Goenaga getariarra; Iñigo Mantzizidor Mantxi, Aner Peritz Euzkitze, Julen Zulaika eta Oier Aizpurua zarauztarrak; eta Aitor Salegi zestoarra. Goenagak eta Mantxik aurreko txapelketan lortu zuten aurtengoan aritzeko txartela; beste zortziak, berriz, Gipuzkoa Bertsotan sailkapen fasetik datoz.
Hauek dira iraileko kanporaketen hitzorduak:
Irailak 21, Lazkao (Areria aretoa):
- Julen Zulaika, Beñat Iguaran, Gorka Maiz, Iban Urdangarin, Iñigo Gorostarzu, Oihana Arana.
Irailak 22, Elgoibar (Herriko Antzokia):
- Libe Goenaga, Unai Izagirre, Eli Pagola, Eneko Araiztegi, Iñaki Apalategi, Uxue Fernandez.
Irailak 28, Hondarribia (Itxas Etxea auditorioa):
- Eneritz Artetxe, Oier Aizpurua, Ane Beloki, Aratz Igartzabal, Maddi Aiestaran, Unai Gaztelumendi.
Irailak 29, Andoain (Bastero kulturgunea):
- Aitor Salegi, Andoni Mujika, Endika Igarzabal, Eñaut Martikorena, June Aiestaran, Manex Mujika.