Zarautz Arraun Elkartearen ETE ligako traineruak denboraldiko lehenengo bandera eman dio klubari. Sestaon (Bizkaia) jokatutako estropada irabazi dute sekulako lana eginda; izan ere, bigarren txandan aritu da Enbata. Ohorezko txandan aritu diren traineruek ere ezin izan dute haren denbora gainditu, nahiz eta, etxean aritu den Kaiku gertu izan duten, bi segundora baino ez. Zumaia, berriz, hirugarren izan da gaurkoan.
Hori horrela, sailkapeneko bigarren postuan jarraitzen du Zumaiak, baina Kaikurengandik hiru puntura orain. ZAEk ere sailkapeneko postu berean jarraitzen du, baina Deusturengandik puntu bakarrera orain. Bihar, gainera, alde hori murrizten jarraitzeko beste aukera bat izango du, Astilleron (Kantabria, Espainia) estropada izango baitute.
