Azkoitiko ahalduntze ikastaroetan izena emateko epea luzatu dute

Emakumeentzako ahalduntze ikastaroak antolatu ditu Azkoitiko Udalak apiriletik ekainera bitarterako, eta izen-ematea joan den apirilaren 6an amaitzen bazen ere, epe hori luzatu egin dute. Hain zuzen ere, tailerren batean parte hartu nahi dutenek, aste honetan ere eman ahal izango dute izena, udaletxeko harrera bulegoan. Udalak onartu berri duen Emakumeen eta Gizonen arteko II. Berdintasun Planaren barruan antolatu dute emakumeak ahalduntzeko doako ikastaro sorta. Orotara, lau tailer eskainiko dituzte: lana bilatzeko coaching tailerra, autoestimua lantzeko ikastaroa, Kontatu gabeko emakumeak. Genealogia feminista artearen historian tailerra, eta autodefentsa ikastaroa. Hauek dira eskainiko dituzten tailerrak, eta horien inguruko xehetasunak. Lana bilatzeko edo aldatzeko coaching tailerra Mertxe Arratibelek eskainiko du. Saioak astelehenetan izango dira, apirilaren 16an eta 23an eta maiatzaren 7an eta 14an, 09:30etik 12:30era. Autoestimua lantzeko tailerra Miriam Herbok emango du. Saioak asteazkenetan izango dira, maiatzaren 10ean eta 24an eta ekainaren 6an, 13an, 20an eta 27a, 17:00etatik 20:00etara. Kontatu gabeko emakumeak. Genealogia feminista artearen historian tailerra Silvia Ayerrak emango du. Saioak apirilaren 18an eta 19an eta apirilaren 21ean izango dira. Apirilaren 18an eta 19an 18:00etatik 20:30era egingo dute tailerra. Apirilaren 21ean, aldiz, 10:00etatik 13:00era. Autodefentsa ikastaroa Kanku Anaitasuna karate elkarteko Rita Juaristik eskainiko du. Apirilaren 14an hasita, hileko bigarren larunbatetan eskainiko dute urte osoan zehar.