Kataluniako espetxeratzeak salatzeko elkarretaratzea egingo dute bihar Azkoitian

Espainiako Auzitegi Goreneko epaile Pablo Llarenaren aurrean deklaratu zuten atzo, ostirala, Jordi Turull, Josep Rull, Raul Romeva eta Dolors Bassa Espainiako Estatuak bertan behera utzitako Kataluniako azken gobernuko kontseilariak eta Carme Forcadell orduan Kataluniako Parlamentuko presidentea. Epaile horrek erabaki zuen horiek denak espetxeratzea ihes egiteko eta matxinada delitua berriz egiteko arriskua dutela argudiatuta. Marta Rovira ERCko idazkari nagusiari ere matxinada delitua egotzi dio Llarenak, baina atzo ez zen deklaratzera agertu; erbestera jo du. Eskualdeko hainbat herritan gisan, Azkoitian ere atzoko gertaerak salatzeko elkarretaratzea deitu dute. Hain zuzen ere, EH Bilduk, ELAk, LABek, ESK-k, Steilasek, Hiruk, CNTk, Etxaldek, EHNEk eta Gure Esku Dagok deitu dute kontzentrazioa, 12:00etan, plazan, Kataluniarekin bat, demokrazia, askatasuna lelopean.