Azkoitiko Baztarrikaldeko festak bihar hasiko dira

Festarako gogoarekin dabilenak aukera bat baino gehiago izango du asteburuan Azkoitian. Gaur, Aingeru Guardan ospatu dute urteroko jai eguna; etzi egingo dituzte Martirietan San Emeterioren eta San Zeledonioren festak; eta bihar eta igandean izango dituzte, berriz, Azkoitiko Baztarrikaldeko aurtengo festetako aurreneko hitzorduak. Bertso afariarekin hasiko dituzte ospakizunak Baztarrikalden; Orion elkartean izango da, bihar, 20:30etik aurrera, Azkoitiko bertsolariekin, eta trikitilarien doinuekin girotuta. Isidro erretegian eman behar da afaritarako izena (943-852003 telefonoa). Igandean egingo dituzte, besteak beste, urteroko asto proba ezagunak; eta bihar zortzi, hilaren 9an, itxiko dute aurtengorako prestatu duten egitaraua, mus txapelketarekin. Hona hemen, Baztarrikaldeko festetako egitaraua: Bihar, ostirala 20:30. Bertso afaria Azkoitiko bertsolariekin eta trikitilariekin, Orion elkartean. Martxoaren 4a, igandea 12:00. Umeentzako zezenak eta pottokak. 17:30. Asto probak, IX. Joxe Astarbe Saria. Azkoitiko Txibilterrek eta Isidro Erretegiak eta Oikiako Astabilak parte hartuko dute. Martxoaren 9a, ostirala 22:30. Mus txapelketa, Orion elkartean. Izen ematea elkartean bertan egin beharko da, txapelketa hasi aurretik.