Ikasleen plaza kopurua igo eta alemana irakatsiko dute Hizkuntza Eskola Ofizialaren Azkoitiko geletan

Gaztanenea Formakuntza Zentroa. (Ihintza Elustondo) Iaztik Gaztanenea Formakuntza Zentroan kokatzen diren Eibarko Hizkuntza Eskola Ofizialaren gela desplazatuetan berrikuntzak izango dira datorren ikasturtean, irailetik aurrera, hain zuzen. Batetik, ingelesa ikasteko talde bat gehiago osatuko da, hau da, 28 plaza berri sortuko dira orain dauden beste 84ri gehituz. Halaber, hizkuntza eskaintza zabaldu egingo da: ingelesaz gain, alemana ikasteko aukera ere izango da. Guztira, 112 lagunek jasoko dituzte ingeleseko eskolak, B1.1, B1.2 eta B2 mailetan. Orain arte maila bakoitzako talde bat zeoen; irailetik aurrera, ordea, bi talde osatuko dira B2 mailarako. Alemanari dagokionez, plaza kopurua 20koa izango da, eta A1 maila eskainiko dute. Azkoitiko Udala aspalditik ari da lanean, aurrena gela desplazatuak martxan jartzeko, eta ondoren, bertako eskaintza zabaldu eta hobetzeko. Marijose Arregi Hezkuntza zinegotziak pozik hartu du Hizkuntza Eskolaren erabakia: "Ia eskola guztietan eskariak gainditu egiten du eskaintza, baina pauso bat gehiago eman dugu. Azkoitian plaza bat gehitzeak esan nahi du bat gutxiago dela klaseetara beste herri batera joan behar duena. Gainera, orain arte eskaintza ingelesera mugatzen zen, eta orain alemana gehitzea oso berri ona da". Alemana, 14 urtetik gora Hizkuntza Eskola Ofizialean matrikula egiteko ezinbesteko baldintza da 16 urte izatea. Alemanaren kasuan, ordea, gutxieneko adina 14 urtera jaisten da, atzerriko bigarren hizkuntza gisa hartzen delako alemana DBHn. Matrikula egiteko epea irailaren 1etik 18ra izango da. Matrikula Internet bidez egin behar da, Eibarko Hizkuntza Eskola Ofizialean.