Zuhaitzak Bizirik taldearen erakusketa izango da bihartik aurrera, Torre Zurin

Erakusketako irudi bat. (Jabier Albizuri) Zuhaitzak Bizirik taldeak erakusketa jarriko du bihartik aurrera, Azkoitiko Torre Zurin. Abenduaren 22tik urtarrilaren 7ra bitartean egongo da ikusgai; goizetan, 10:00etatik 13:00etara, eta arratsaldeetan, 17:00etatik 20:00etara. Hainbat ataletan banatuta dago erakusketa. Txoriak erakartzeko formula batzuk daude, zuhaitzak landatzeko egokiak diren Azkoitiko berdeguneen berri ematen da, adarrak gehiegi mozten zaizkielako zuhaitzak nola galtzen diren azaltzen da, sekula adarrak moztu ez zaizkien zuhaitzen irudi batzuk ere badaude.... Horiez gain, txori etxeak, eskuz margotutako kristalezko botilak, erratz naturalak, konpota eta marmeladak, zuhaitzei buruzko liburuak eta koadroak ere izango dira ikusgai. Jabier Albizuri da erakusketaren arduraduna, eta hark adierazi duenez, zuhaitzen egoeraren inguruan "kontzientzia sortzea eta herritarrak inplikatzea" dira bere helburuak. Taldeari laguntza emateko moduak badaude, hala nahi duenarentzat. Bestalde, hilaren 29an Las estaciones filma emango dute Baztartxon, 19:00etan. Doan izango da sarrera.