GUTUNA: Maxixatzen Udalean oker esanak zuzentzekotan

1766ko matxinadaren inguruan antolatutako ekitaldiak direla eta, Udaleko azken osoko bilkuran Udal gobernuko ordezkariek bi aldiz adierazi zuten ekitaldi horietako antolatzaileek ez zietela ekitaldietan parte hartzeko gonbidapenik egin, baizik eta antolatzaileek udalaren lokalak eta erakustokia bakarrik eskatu zituztela. Joan den apirilaren 5eko goizeko 10:30ean Aitor Arruti Rezabal Maxixatzeneko kidea kulturako teknikari arduradunarekin elkartu zen, Matxinadaren 250. urteurrenaren antolatzaile diren Azpeitiko Kultur Mahaia eta Maxixatzen Euskaldunon Elkartearen izenean. Azpeitiko Kultur Mahaiko teknikaria ere bileran izatekoa zen arren, azkenean ez zuen bertaratzerik izan. Bileraren helburu nagusia Azkoitiko Udalak proiektuarekin bat egitea zen. Artean erabat osatu gabe zegoen egitarau osoaren berri eman zion Aitorrek teknikariari, eta azaldu gure nahia Azkoitiko Udalak egitasmoarekin bat egitea zela; are gehiago, Azpeitiko Udalak proiektuari babes osoa eman ondoren. Handik astebete pasatxora egitekoa zen aurkezpenean Udaleko ordezkariren bat izatea nahi genuela ere esan zion. Handik bi egunera, apirilaren 7an, kultura teknikariak deitu zion Maxixatzeneko kide Naroa Olalderi, eta adierazi Udalak egitasmoa ez babestea erabaki zuela, baina, hala ere, prest zeudela unean-uneko diru-laguntzak emateko. Atsekabez hartu genuen berria, eta, proiektuan Azkoitiko erakunde bakarra izanik, aurrera jarraitu dugu ekitaldiak antolatzen. Gure iritziz, egokia da herritar guztiek historia osorik ezagutzeko aukera izatea, berdin orain dela 250 urtekoa eta gaur egungoa, eta iritzi horrek gidatu ditu gure pausoak ekimen honetan. Euskal kultura eta euskara bere herrian bizi dadin ari gara lanean, bai Matxinadaren urteurrena bere baitan jaso duten Maiatzeko Lorak jardunaldietan, bai udazkeneko Orbel Joko jendetsuetan, eta baita gainerako lan-ildo guztietan ere.

Asteleheneko, maiatzak 30, udalbatzarrean mozioa aurkeztu zuen EH Bilduk. Testu horretan, matxinadaren 250. urteurrena dela-eta egiten ari diren ekintzetan parte hartzeko eskatzen zitzaion udal gobernuari. EAJk mozioaren aurka bozkatu zuen. Irakurri albistea, hemen.