Hasi dute mende laurdena beteko duen bertsopaper lehiaketa

Bertsopaper lehiaketa antolatu dute, beste behin, Xabier Munibe Ikastolako Indarlan eta Udaberri guraso elkarteek. Bertsolari parte-hartzaileek lau eta sei bertso artean sortu beharko dituzte, gai eta neurri librean. Lanak jasotzeko azken eguna maiatzaren 13a da. Sari banaketa, berriz, maiatzaren 27an egingo dute, Baztartxon, 12:30ean. Ohi bezala, bi multzotan banatuko dituzte parte-hartzaileak: A multzoan sartuko dituzte DBHko 1. eta 2. mailakoak, eta B multzoan, DBHko 3. eta 4. mailakoak. Derrigorrezko baldintza da bertsoek berriak izatea, hau da, beste inon aurrez aurkeztu gabeak. Parte-hartzaile bakoitzak bi bertso sorta bidal ditzazke. Lehiaketan parte hartu nahi dutenek, lanak entregatzeko aukera desberdinak dituzte: posta arruntez bidaliz gero, bertso sortak ezizenez sinatu behar dira. Beste azal batean egilearen izen-abizenak sartuko dira, kanpotik ezizena bakarrik jarriz. Bietan, zein atalekoa (A edo B) den adieraziko da. Lanen hiru kopia helbide honetan jasoko dituzte: Xabier Munibe Ikastola, XXV. Bertsopaper Lehiaketa, 75 posta kutxa, 20720, Azkoitia. Posta elektronikoa erabiliz gero, bi dokumentu jaso nahi dituzte, word formatuan xabiermunibebertsoak@gmail.com-era. Lehenengoan, bertso sorta eta ezizena idatzi, eta, bigarrengoan, egilearen datuak. Dokumentuaren izenburuan, egilearen atala (A eta B) eta ezizena jakinaraziko dira. 100 euro eta ikastolaren oroigarria jasoko ditu aurreneko sarituak; bigarrenak, 75 euro eta oroigarria; eta, hirugarrenak, 50 euro eta oroigarria.