Bezeroak fidelizatzeko kanpaina abiatu du Zumaiako Merkatari Elkarteak

Zumaiako Merkatarien eta Ostalarien Elkarteak, Rural Kutxarekin elkarlanean, bezeroen fidelizazio kanpaina berria jarri du abian. Hala, Zumaia Elkarteko 52 saltokietan erosketak Zumaia txartelaren bidez egiten dituztenek deskontuak eskuratuko dituzte. «Helburua herritarrek erosketak herrian bertan egitea da, ekonomia sozial bat sustatzeko», azaldu dute bultzatzaileek. Kanpaina gaur bertan hasiko da, eta urte amaierara arte egongo da martxan. Dendaren arabera, deskontua %2koa edo %5ekoa izango da, eta hurrengo erosketan denda berean egingo den erosketan aplikatuko da (lehenengo erosketan ez da deskonturik izango). «Ordainketa kreditu eran egiten dutenek bakarrik eskuratu ahal izango dituzte deskontuak; zuzenean edo epeka egitea hautatzen dutenek ezingo dute kanpainan parte hartu», argitu du Rural Kutxako arduradunak. «Deskontuaren berri erosketa txartelean agertuko bada ere, ez da beharrezkoa izango ticketa gordetzea, informazioa datafonoak berak gordeko baitu», gaineratu du. Kanpainan parte hartzen duten saltokien zerrenda www.zumartian.com/deskontuak webgunean argitaratuko dute. Horrez gain, kanpainako partaide direla adierazten duten kartelak ere jarriko dituzte erakusleihoetan. Saltokiak eta deskontuak %2ko deskontua eskainiko duten denden artean edertasun zentroak eta ile-apaindegiak, farmaziak eta parafarmaziak, gozoki dendak, gasolindegiak, garajeak, informatika eta elektrizitate dendak, altzari eta dekorazio dendak, etxetresnak, liburu dendak, papertegiak, elikadura dendak, opari eta osagarrienak eta argazkigintzakoak daude, elkarteko kideek azaldu dutenez. Berriz, %5eko deskontua eskainiko dute arropa dendek, oinetakoenek, mertzeriek, erloju-dendek, optikek eta loradendek daude.