Emakumeen erabakitzeko eskubideak aldarrikatuko dituzte Azkoitian, martxoaren 8an

Atzo aurkeztu zuten egitaraua
(Ane Olaizola) Azkoitiko Udalak eta Emakumeen Mahaiak martxoaren 8aren, Emakumeen Nazioarteko Egunaren, harira prestatu duten egitaraua aurkeztu dute hango ordezkariek eta herriko hainbat emakumek. Urtetan zehar, "mugimendu feministari esker", berdintasunerantz "aurrerapusu nabariak" lortu badira ere,  "benetako berdintasuna" lortzeko "asko" falta dela azpimarratu dute. "Ezagunak dira emakumezkoek hainbat arlotan dituzten oztopoak; lan arloan, kirolean, kulturan. Etxeko lanak eta zainketak oraindik emakumeen ardurapean daude, pobreziak emakumearen aurpegia du, lan berberagatik diru gutxiago kobratzen dute, eta batez ere, emakumeek jarraitzen dute indarkeria matxista pairatzen", adierazi dute. Era berean, "gobernu kontserbadoreek" eramaten dituzten politikek emakumeek euren gorputzarekiko duten erabakitzeko eskubidea urratzen dituztela salatu dute; "ez gaude prest galera horiek onartzeko", ohartarazi dute. Hala, aurtengo ekitaldiak 'Gure gorputza, gure erabakia. Emakumeok gure eskubideen jabe" lemapean egingo dituzte. Giza eskubideen “urraketa onartezin horiek” desagertzeko lan egiteko beharra dagoela azpimarratu dute, urteko egun guztietan, ez soilik martxoaren 8an; “berdintasuna ez da emakumeen kontu bat, baizik eta jendarte osoarena. Horretarako, egun guztiak martxoak 8 izan behar dira. Antolatzaileek herritarrei dei egin die ekitaldietan parte hartu dezaten eta berdintasunaren aldeko jarrerak egunero izan ditzaten. Hemen martxoaren 8ko egitaraua:

• Martxoak 7, ostirala:

- 15:00etan, emakumeen festa internazionala. Jatorri ezberdineko emakumeak elkartuko dira, eta besteak beste, janari dastaketa, musika eta ekintza ezberdinak egongo dira. Norberak jateko zerbait eraman eta festara gonbidatu dituzte emakume guztiak. - 22:00etan, Pink Saris filma, Baztartxon.

• Martxoak 8, larunbata

- 13:00etan elkarretaratzea, txalapartari eta bertsolarikein. - 17:30etik 18:30era (bi saio) Printzesak kontu kontari ipuin kontaketa, Elkargunean. - 22:00etan, Pink Saris filma, baztartxon

• Martxoak 9, igandea

17:15ean eta 19:30ean, La estrella filma

• Martxoak 10, astelehena

20:00etan, La estrella filma, Baztartxon.

• Martxoak 29, larunbata

Autodefensa feminista ikastaroa, Elkargunean. 10:00etatik 14:00etara, eta 15:30etik 17:30era. 17 urtetik gorakoek hartu dezakete parte, eta izena dagoeneko eman daiteke, udaletxean edo Elkarguneko Gazte Bulegoan. Emakumeen Mahaia herritarrek eta udaleko ordezkariek osatzen dute. Hilean behin elkartzen dira, ostegunetan. Gogoratu dute edozeinentzat dagoela zabalik.