Azkoitiko Kontrako Eztarrixe irrati libreak festa egingo du larunbatean, eta 2013-2014rako prestatu duen egitaraua aurkeztuko du. Egun osoko egitaraua prestatu dute antolatzaileek, eta beren lana plazaratzako hainbat ekimen egingo dute; 13:00etan zuzeneko emisioa emango du kateak, herriko plazatik.
17:00etan, berriz, ate irekien saioa egingo dute Kontrako Eztarrixeren Santa Klara 4 helbideko egoitzan. Bertaratzen direnek irratiak nola funtzionatzen duen ikusi eta irratsaio bat nola egiten den ikasiko dute. Gauean, berriz, kontzertuak izango dira Matadeixen; Kakahuete oiartzundarrek, Madeleine donostiarrek eta Kaskezur Elizondoko taldeek eskainiko dute saioa. Sarrera bost eurotan jarri dute.
Kontrako Eztarrixe irrati librea Fm 94.2 frekuentzian edo kontrakoeztarrixe.blogspot.com helbidean entzun daiteke.
Gukak zu bezalako irakurleen babesa behar du tokiko informazioa euskaraz eta modu profesionalean lantzen jarraitzeko.
Izan Gukakide
Izan Gukakide