Elgoibarko taldeari gailenduta, Azkoitiko pilotariak Herriarteko Txapelketaren finalerdietarako sailkatu dira. Donostiaren kontra jokatuko dute finalerako bidean azken urratsa dena, ostiralean hasita.
Joaneko neurketan bezalaxe, Azkoitiko Oteiza Pilota Eskolako jokalariek 2-1 irabazi zuten joan den ostiralean Gurean jokatutako partidetan. Azkoitiarrek aurreko astean auto istripua izan zuen Iholdi Zubizarreta ‘Koatei’ taldekideari eskaini zioten garaipena.
Kadeteen partidan, 19-22 galdu zuten etxeko pilotariek. Bigarren neurketa, jubenilena, ez zen ondo hasi azkoitiarrentzat baina norgehiagoka gogor baten ondoren, 22-12 irabaztea lortu zuten. Hirugarren partidan jokoan izan zen finalderdietara igaro ala ez, eta nagusiek ondo erantzun zioten erronkari. Anduezak eta Zendoiak partida bikaina egin zuten eta 22-19 menperatu zituzten elgoibartarrak. Honenbestez, Azkoitia finalerdiak jokatzen hasiko da aste honetan. Lehen neurketa etxean izango dute, datorren ostiral gauean Gurea frontoian.