Urola Ikastola Azkoitia-Azpeitia BHIko Azkoitiko ikastetxeak ate irekien egunak egingo ditu etzi, maiatzaren 19an, eta 21ean, larunbatez. 2011-2012 ikasturtean lanbide heziketako zikloren bat edo batxilergoren mota bat bertan ikasteko interesa duten ikasleei eta haien gurasoei egin diete jardunaldietan parte hartzeko gonbita berezia.
Osteguneko ekitaldia 18:30ean hasiko da Altamira auzoan dagoen ikastetxean. Larunbatekoa, berriz, 10:30ean izango da. Aipatu egunetan, Urola Ikastolako eraikuntza eta instalazioak erakutsiko dituzte: altzarigintzako tailerra eta laborategiak, mekanikako tailerra nahiz automatismo eta metrologia laborategiak, administraritzako bulego operatiboa, eta gela digitalak eta arruntak ezagutzeko aukera izango da, beraz.