Azkoitia Lantzenen kontseiluak Egino Berriko ingurumen egokitze lanak Lurkide enpresari esleitzea erabaki zuen atzo (ostirala) goizean egindako batzarrean. Ingurumen egokitze lanen esleipenarekin urrats bat gehiago eman da Elgoibarko Bernardo Ecenarro enpresa 2012. urtea bukatzerako Egino Berri industrialdera etortzeko. Aurreikusitako egitarauari jarraituz, Azkoitia Lantzenek Lurkide enpresari esleitu dizkio lehenengo lanak, ingurumen egokitzeari dagokionak, hain zuzen. Lurkidek hilabete eta erdiko epea izango du horretarako. Aurrez, eta prozesu luze baten ostean, beharrezkoa zen baimena lortu da Eusko Jaurlaritzaren aldetik. Horrela, Oñeder zabortegi zena gune industrial batek ordezkatu ahal izango du.
Egokitze lanak maiatzean hasiko dira eta 496.000 euroko aurrekontua dute. Behin haiek bukatuta, Bernardo Ecenarroren lantoki berria eraikitzeko obrak hasiko dira.