Goizean goizetik San Andresei ongietorria emango diote bihar herrian, eta iluntzera bitartean ez da ekitaldirik faltako. Hala, urtero bezala, herri kirolak, talo eta txorizo txosnak eta lehiaketak plazara aterako dira; izan ere, egun osoan zehar Azkoitiko Xabier Munibe ikastolak, Floreaga ikastetxeak, Azkoitia-Azpeitia Urola Kostako BHIk, Ikasberri ikastolak eta Etxerat-ek postuak jarriko dituzte herriko plazan. Halaber, egurdian Olasagasti eta Nazabal Euskal Herriko aizkolari txapelkdunak eta txapeldunordeak eta Goenatxo II. eta Goenatxo III. harri-jasotzaileek erakustaldia egingo dute.
Haurrek ere izango dute ongi pasatzeko aukerarik, goizean herriko txokoetan margotzen ibiliko baitira Txuri Urdin elkarteak antolatu duen Marrazki eta Buztina-modelatze lehiaketan.
Arratsaldean, berriz, Kontzejupean zazpi urtetik seniorren mailara arteko pilotariek Kontzejupe pilota txapelketako finalak jokatuko dituzte, 17:00etatik aurrera.
Horiez gainera, trikitilariak eta dultzaineroak ibiliko dira goizean zehar kaleak girotzen.