Aurrera doaz Pasaia aldean San Juan baleontzia eraikitzeko lanak. Pasa den Pasaia Itsas Festibalean ehunka bisitari izan eta gero, barne ekipamendua osatzeko lanei ekin zioten, eta horren barruan garrantzia berezia izan du sukaldeak. "Elikagaiak prestatzeko gunea baino askoz gehiago zen sukaldea, itsasontziko bizitzaren erdigune nagusienetako bat, ezinbesteko lekua ozeanoetako espedizio luze horiei eusteko eta duela lau mende baino gehiago Atlantikoa zeharkatzen zuten euskal baleazaleen egunerokotasuna ulertzeko", azaldu dute Albaolako kideek.
Belaontziko sukaldea martxan jartzea San Juanen eraikuntzaren beste mugarri bat bezala definitu dute, eta horretarako "aitabitxi aparta" aurkitu du Albaolak, Getariako Elkano jatetxeko arduradun Aitor Arregi, hain zuzen ere. Arregik Elkano jatetxetik eramandako sua zeraman kriseilu batean piztuta, eta gar hori erabili du sukaldea lehendabizikoz pizteko. "Keinu horrek gaur egungo euskal gastronomia- tradizioaren eta XVI. mendeko ozeanoetako ontzi handietan garatzen zen eguneroko bizimoduaren arteko lotura sinbolizatu nahi izan du", nabarmendu dute.