Isuna jarri diote Intza Gurrutxagari eta auzi gelatik kanporatu dute frantsesez deklaratzeari uko egin ondoren

Onintza Lete Arrieta 2025ko api. 12a, 09:14

Gorka Torre eta Intza Gurrutxaga, atzo, Baionako Auzitegira sartzen. (EHE)

Euskal Herrian Euskaraz mugimenduko kide getariarra 500 euroko isuna ordaintzera kondenatu zuen atzo Baionako Auzitegiak; Gorka Torre kideari, berriz, 1.000 euroko isuna ezarri diote. Abenduaren 3an Baionako Auzitegiaren teilatura igo ziren, eta Justizia euskararentzat mezua idatzi zuten paretan. Ekintza horregatik epaitu dituzte.

500 eta 1.000 euroko isunak ordaintzera kondenatu ditu Baionako Auzitegiak Intza Gurrutxaga eta Gorka Torre Euskal Herrian Euskaraz (EHE) mugimenduko kideak, abenduaren 3an burutu zuten desobedientzia ekintza batengatik. Baionako Auzitegiaren teilatura igo ziren, eta hango horman Justizia euskararentzat mezua idatzi zuten. Epaiketa atzo izan zen Baionako Auzitegian, eta Gurrutxaga getariarrak 500 euro ordaindu beharko ditu; Torrek, berriz, 1.000 euro.

Epaiketa atzo hasi eta amaitu zen, eta EHEko kideek ez zuten deklaratu, euskaraz hitz egitea eskatu baitzuten. Eztabaida luzea izan zuten epaileekin, eta azkenean, Poliziak kanporatu egin zituen bi kideak. Haiei babesa ematera joan zirenen oihu artean kanporatu zituzten.

Epaiketaren aurretik, elkarretaratzea deitua zuen EHEk epaitegi aurrean, eta dozenaka lagun bildu zen Justizia euskararentzat, justizia euskaldunontzat lelopean. Apirilaren 6an manifestazioa  izan zen Baionako kaleetan zehar, eta Getariako Udalbatzak Gurrutxaga herrikideari babesa erakutsia zion. Atzo bertan Baionan izan ziren Getariako udal ordezkariak, Haritz Alberdi alkatea buru zela.

Atzo Baionan, Getariako udal ordezkariak Intza Gurrutxagarekin. Ezkerretik hasita, Ane Loidi zinegotzia, Gurrutxaga bera, Haritz Alberdi alkatea eta Ekaitz Esteban alkateordea. (Getariako Udala)

Herritarrei deia

Epaiketa amaitu berritan, Euskal Herrian Euskarazek mezu argia helarazi zien euskal herritarrei, elkar hartuta beren hizkuntza defenda dezaten: "Euskaldunon aurkako zapalkuntzari jarrera intsumisoz eta desobedienteaz erantzuteko deia egiten dugu. Kolektiboki antolatuz, batu ditzagun indarrak, eta eraiki dezagun desio dugun Euskararen Errepublika!". 

Jakinadazi zuten, bestetik, gaur abiatuko dutela bi militanteen isunei aurre egiteko elkartasun kanpaina.

Gukak zu bezalako irakurleen babesa behar du tokiko informazioa euskaraz eta modu profesionalean lantzen jarraitzeko.


Izan Gukakide