Egun guztian egin zuen bero itogarriak arnas pixka bat emanda, sekulako gau giroan hasi zituzten sanjoanak urrestildarrek. Gauerdiaz geroztik lizarra zutik da plazan, festetan bete-betean direnaren erakusle, eta hala jarraituko du ostiral iluntzera arte, aurtengo sanjoanak bukatu arte. Umeek, gazteek zein helduek gogoz hartu dituzte festak, eta festa batzordeak antolatu dituen jarduerei ahalik eta zukurik gehien ateratzeko prest dira guztiak ere; hala aitortu diote Gukari.