Azpeitiak hartu du 2023ko Bertso Eguna, eta eguraldi petrala ez da bertsozaleen festa zapuzteko gai izan.
Atzo, larunbatez, ospatu zuten Bertso Eguna, eta goizean goizetik, bertsoa, jan-edana eta giro ona izan ziren protagonistak Azpeitian.
Eguerdian Alde Zaharrean barrena bertso poteoa egin ostean, bazkariak izan ziren Ziripot, Zulo-Zabal, Oilo-Soro, Oilagorra eta Txalintxo elkarteetan, eta bertsolariek bertsoz girotu zuten bazkalostea. Gauean borobildu zuten festa Azoka Plazan egindako bertso afariarekin. Eguna amaitzean, pozik agertu ziren bertsozaleak nahiz antolatzaileak.