Domu Santu bezperan Gau Beltza ospatu izan da ohituraz Euskal Herrian, baina azken urteetan Halloween ospakizunak hartu ditu herrialdeko hainbat txoko; tartean, Azkoitikoak. Urriaren 31ren atarian, egun berean ospatzen diren bi festa egun horien inguruan aritu zen atzo hizketan Josu Ozaita antropologoa, Azkoitiko Euskara Mahaiak antolatutako Gau Beltza ez da Halloween solasaldian.
Elkarguneko Oteiza aretoan elkartu ziren hainbat herritar Gau Beltzaren inguruan sakontzeko. Antropologoa Gau Beltza: Itzalitako kalabazen berpiztea lanaren egilea da Jaime Altunarekin batera, eta Ozaitak honako galdera hauek erantzunez osatu zuen atzoko hitzaldia: zer da Gau Beltza? Nolako izaera du? Zer gertatu da azken urteotan? Galdera horiek erantzuteko, Gau Beltza berreskuratu duten hainbat udalerriren kasuak plazaratu zituen, eta eredu bat baino gehiago jarri zituen adibidetzat.
Euskara Mahaia, prestaketetan
Ikasturtea hasi zuenetik, Gau Beltzaren lanketan murgilduta dabil Euskara Mahaia. Taldearen asmoa da aurten Azkoitian aurrenekoz Gau Beltzari lotutako ekitaldiak antolatzea, eta gaia herritarren artean gizarteratzeko asmoz prestatutako solasaldia izan zen atzokoa. Hain zuzen, Gau Beltza antolatzeko herritarren beharra duela azaldu du Euskara Mahaiak, eta festa hori antolatzen ari den lantaldean parte hartzera animatu ditu herritarrak; batez ere, gurasoak, haien seme-alabak izango direlako egun horren bueltan egingo diren ekintzak jasoko dituztenak.
Josu Ozaita antropologoa, atzo, hitzaldian. (Ane Olaizola)