Ikusmina eragin zuen atzo Aian sei harri-jasotzailek beren marka pertsonalak hobetzeko egindako hitzorduak. Joseba Ostolazaren eskolakoak dira guztiak, eta ez zuten hutsik egin: saio ikusgarriena Udane Ostolazarena izan zen, bere pisua bi bider jasotzea lortu baitzuen, eta baita bi kilo gehiago ere; 122 kilokoari hiru jasoaldi eman zizkion hiru minutuan. Aurrez inork egin gabeko marka da hori.
Xabier Aranburu Guzta-k aurrenekoan lortu zuen 237 kiloko errektangular modernoa altxatzea; Xiker Larrea, Goikoetxe-k bigarren saiakeran lortu zuen 200 kiloko errektangular modernoa jasotzea; Gari Garmendia Garmendia II.-ak ere bigarrenean lortu zuen 215 kiloko harri errektangular zaharra altxatzea; eta Estefania Etxebeste Estefi-k, azkenik, hiru minutuan 10 jasoaldi eman zizkion 100 kiloko zilindro zaharrari.
Aroa Sanchez izan zen helburua lortu ez zuen bakarra: 135 kiloko harria altxatzea, baina lesionatuta ibili da oriotarra, eta zaila zuen erronka handia burutzea.
