Joan zen ostegunean eman zituen Udal Gobernuak Torreagako babes ofizialeko etxebizitzen inguruko xehetasunak, eta atzo uztaileko ohiko udalbatzarrean eztabaidatu zuten gaia. Hain zuzen, etxebizitzen eta trastelekuen zozketarako eta esleipenerako oinarriak udalbatzatik igarotzea beharrezkoa da prozedurak aurrera egin dezan, eta aho batez onartu bazuten ere, bilkuran eztabaida izan zen zenbait oinarriren inguruan.
Xabier Odriozola EAJren zinegotziak hartu zuen hitza, eta hark azaldu zituen dokumentuarekin dituzten desadostasunak. Batetik, aipatu zuen jakitun direla udalaren eskumenak mugatuak direla oinarri gehienei dagokienez: "Zozketa nola egingo den eta erroldaren ezaugarriak baino ezin ditu zehaztu udalak". Jaurlaritzarenak dira prezioaren eskumenak, eta hori horrela izanik, "erroldaren ezaugarriei pisu gehiago ematea" galdegin zuten jeltzaleek.
Udal Gobernuak erroldari lotuta proposaturiko baldintzak honako hauek dira: azken hamar urteetan bost urtez edo azken bi urteetan eteknik gabe Zumaian erroldatuta egon izana. EAJren udal taldeak, berriz, gutxienez azken bost urteetan etenik gabe edo azken hogei urteetan hamar urtez herrian erroldatuta egon izana jasotzea proposatu du. Odriozolaren arabera, "eskualdeko beste udalerrietan aplikatzen diren irizpideetan" oinarritzen da beren proposamena. Iñaki Ostolaza alkatearen esanetan, ordea, 2023ko martxoan adostasunez onartu zituzten udal sustapeneko etxebizitzen ordenantzaren oinarriak, eta oinarri horien aurka datoz orain EAJk proposaturiko puntuak.
Erroldarekin loturiko oinarriez gain, Odriozolak nabarmendu zuen 2018an EAJ alkatetzan zegoela lortutako hitzarmenari esker egingo direla etxebizitza tasatuak eta babes ofizialekoak orain Torreagan. "Hasiera batean ez bezala, etxebizitza horiek ez dira guztiak libreak izango; aitzitik, %20 tasatuak izango dira, %20 babes ofizialekoak, eta gainerakoak libreak. Hori izan zen hitzarmen berriaren aldaketa garrantzitsuena", gaineratu zuen. Ostolazak, halaber, aipatu zuen "legeak eskatzen duen gutxieneko kopuruari" erantzuten diela udal sustapeneko eta babes ofizialeko etxebizitzen ehunekoak, eta "gutxiago ez, baina gehiago egitea" proposa zitekeela 2018an.
Mugikortasun plana, aurrera
Beste zenbait aztergai ere izan zituzten atzo udalbatzarrean, eta horien artean da Hiri Mugikortasun Jasangarriko Plana. Argi Yeregi Hirigintza zinegotziak hartu zuen hitza plan horren nondik norakoak aletzeko, eta azaldu zuen batik bat oinezkoen eta bizikleten mugikortasuna lehenetsi nahi izan dutela. "Berdintasun ikuspegia" aipatu zuen, bestetik: "8 urteko batentzat nahiz 80 urteko batentzat atsegina izango den mugikortasun eredu bat proposatu dugu". Jaso dituztenak Europatik datozen irizpideak direla nabarmendu zuen Yeregik, eta 2030 Agendaren barruan kokatu zuen plana. Haren hitzetan, plan hori "gidalerro bat" izango da, gero etorriko diren proiektuak oinarri horren arabera garatzeko gida bat.
Planaren funtsezkoarekin ados daudela gaineratu zuen Ainhoa Ilarramendi EAJren zinegotziak, abstentzioaren aldeko hautua egin zuten arren –PSE-EEren hautetsi Duñike Agirrezabalaga ere abestenitu egin zen–. Besteak beste, jeltzaleak ados daude oinezkoen eta bizikleten mugikortasunari lehentasuna ematearekin, ingurune atseginagoa eta osasuntsuagoa sustatzearekin eta ibilgailu motordunentzako espazioa murriztearekin. Nolanahi ere, plana "atzerapen nabarmenarekin" datorrela gaineratu zuen Illarramendik. Haren hitzetan, 2021erako onartua behar zukeen planak, eta atzerapenaren ondorioz, Zumaiak ezin izango ditu beste erakundeek abian jarri dituzten finantzaketa bideak aprobetxatu eta bestelako laguntzak jaso. Kudeaketa ekonomiko indartsua egiteaz gain, "azkartasuna eta irmotasuna" beharrezkotzat jo zituen EAJren zinegotziak, eta aipatu zuten alegazio epea erabiliko dutela hobekuntzak aurkezteko.
