Jaietan bete-betean murgilduta segitzen dute Aizarnan. Gaur, amabirjinetako hirugarren eguna izanagatik, herritarrak atzera festa giroan murgildu dira eguerdi partean. Hain zuzen ere, umeek krosa egin dute 12:00etan hasita, eta hainbat herritar paella prestatzen ere hasi dira ordu horren bueltan.
Oilasko biltzea izan da eguerdiko protagonista, ordea. Urtero legez, gazte talde bat baserriz baserri ibili da 07:30ean hasita, eskean eta dantzan, trikitilariek lagunduta, eta ohiturari segituz, plazan elkartu dira eguerdian. Ikusmina piztu du ekitaldiak; hainbat lagun joan dira plazara partaideen aurreskua ikustera. Gero, herritar hainbat elkartu dira plazaren bueltan, paella bazkaltzeko.
Gauean segituko du egitarauak. Izan ere, Laket taldearen erromeria izango da 22:30ean hasita, eta hura bukatzean, Costmix DJak emanaldia eskainiko du.
Bihar izango da festetako azken eguna, baina izango da ekitaldirik. Hona hemen egitaraua:
Bihar, astelehena
- 11:00-13:00. Kalaka zurezko jolasak.
- 13:30. Umeen bazkaria.
- 17:00. Ginkana.
- 19:00. Osto DJa.
(Argazkiak: utzitakoak)