Ezin emankorragoa izan da euskal selekzioarentzat Esku Pilotako Nazioarteko Konfederazioaren (CIJB) XI. Munduko Pilota Txapelketaren lehen jardunaldia. Atzo hasi zen txapelketa hori Mendozan (Argentina), hiru modalitatetan lehiatu ziren euskal ordezkariak, eta jokatutako neurketa guztiak irabazi zituzten.
Naroa Agirre arroarra izan zen estreinaldi arrakastatsuaren protagonistetako bat. Selekziokideen batera, One Wall modalitateko sailkapen ligaxkako zazpi norgehiagokak gainditu, eta etzi, ostirala, jokatuko den finalerako txartela eskuratu zuen atzo Agirrek. Ingalaterra, Italia, Txile, Argentina, Venezuela, Herbehereak eta Valentziako selekzioak garaitu zituen euskal selekzioak finalerako bidean, aukari bakoitzaren kontra bi partida jokatuta. Horrenbestez, guztira hamalau partida jokatu eta irabazi zituzten euskal selekzioko emakumeek, eta horietatik hirutan aritu zen Arroagoiko pilotaria.