Hamabost paella-ontzi inguruk usai berezia eman diote zapatu eguerdi honetan Arroabeko Karmengo jaiei. Oilaskoa txigortu, barazkiak bota, eta arroza nork bere sekretuekin gozatu du, platerik onena kozinatzeko grinez. Azkenean, epaimahaiak erabaki du Olatzek eta Ainhoak egindakoa izan dela paellarik onena, eta Gabrielek eta Cesarrek osatutako bikoteari eman dio aurkezpen onenaren saria.
Etxeko amantalik txukunena hartuta aritu dira kozinatzen parte hartzaileetako batzuk; beste batzuek, ordea, bezperako txapel eta betaurreko deigarrekin segitzen zuten. Suak itzali eta lehiaketa amaitu ostean, frontoian jarri duten mahai luzean bazkaldu dute guztiak elkarrekin, sardexkak paella-ontzi guztietara arrimatuz.
Suak bai, baina festa ez da oraindik itzali Arroabean. Bihar 22:00etan Karmentxuren agurrarekin amaituko dira Karmenak, baina, horren aurretik, egitarau zabalaz gozatzeko aukera izango dute arroarrek:
Gaur, larunbata:
- 17:30. Albara ganadutegiko zekor enbolatuak, Joxe Migel plazan. Ondoren, Zumaiako Karropoteua.
- 23:00. Bikabi, La Txama eta Indate DJa.
Bihar, igandea:
- 10:30. Txistulariak.
- 11:00. Kalaka jolas kooperatiboak.
- 13:00. Zestoako bandaren kontzertua.
- 17:00. Buruhandiekin kalejira.
- 17:30. Asto proba.
- 19:00. Izer eta Alabierrekin erromeria.
- 22:00. Karmentxuren agurra.