Zestoan otsaileko ohiko udalbatzarra egin zuten, atzo, ostegunez. Udal antolaketaren birmoldaketa izan zen batzarreko puntu garrantzitsuena. Hain justu, aldaketa batzuk egin dituzte udalaren osaketan, bai batzordeei dagokienez, bai udalaz haragoko erakundeei dagokienez. Izan ere, Zigor Plazaola EH Bilduko zinegotziak –lehen alkateordeak eta Hirigintza batzordeburuak– utzi egingo du orain arte zuen liberazioa, eta, beraz, zituen ardurak betetzeko ezintasuna izango du. Lehengo lanpostura itzuliko da Plazaola, eta horrek aldaketa bat egitera behartu du udal gobernua. Batez ere bi batzorderi eragingo dio horrek: Hirigintza batzordeari eta Ogasun batzordeari. Bi batzorde horietan, Plazaolaren hutsunea Lorea Ilundainek beteko du. Horrekin lotuta, Ilundain izango da aurrerantzean alkateordea.
Zehazki, hauek izango dira udaleko aldaketak. Plazaolaren ordez, Ilundain izango da aurrerantzean Hirigintza batzordeburua. Ogasun batzordean ere, Ilundainek beteko du Plazaolaren tokia –Arregik jarraituko du batzordeburu izaten–. Era berean, orain arte lehen alkateordea Plazaola zen, eta Ilundain bigarrena; aurrerantzean, alderantziz izango dira.
Ilundainek %100eko liberazioa hartuko du, baina kontua da hura une honetan Hezkuntza sailean ari dela lanean, irakasle. Egin beharreko tramiteak gauzatutakoan hasiko da Ilundain udalean dedikazio osoz; Mikel Arregi alkateak batzarrean azaldu zuenaren arabera, printzipioz martxoaren 10ean jarri dute liberazioaren hasiera, baina gerta likete tramiteak tarteko data horretan gorabeheraren bat izatea.
Udalaz haragoko erakundeak
Udalaz haragoko erakundeetan ere izango dira aldaketak; kasu horretan, EAJko ordezkariek planteatu dituzte aldaketak. Aurrerantzean, Urola Erdiko Mankomunitateko ordezkari titular Montse Atxega izango da, eta ordezkoa Garikoitz Mendizabal; orain arte alderantziz izan dira. UEMAren kasuan ere, antzeko aldaketa egingo dute; UEMAn gaur arte Atxega izan da ordezkari titularra, eta aurrerantzean Atxega ordezkoa eta Mendizabal titularra izango dira.
Bestalde, San Juan fundazioan, Itulain izango da aurrerantzean bigarren ordezkaria. Gipuzkoako Ur Kontsortzioan Arregi da ordezkari titularra, eta Plazaola zen ordezkoa orain arte; baina hemendik aurrera, Ilundain izango da ordezkoa. Era berean, Arregi zen orain arte Urkomeko Zestoako Udaleko ordezkaria, eta Aitor Osa ordezkoa. Aurrerantzean, alderantziz izango dira. Dena den, Arregi Urkomeko zuzendaritza batzordeko kide da, baina ardura hori utzi egingo duela esan zuen hark. "Gauzak ondo bidean, Aitor izendatuko dugu zuzendaritza batzordeko kide. Landaolako ordezkari ere ni naiz, baina ardura hori ere Aitorrek hartuko luke".
EH Bilduren naiz EAJren aldeko botoekin onartu zituzten udalaren antolamenduko aldaketa horiek guztiak.
Martxoaren 8ari begira, bat eginda
Martxoaren 8aren atarian, EAJk eta EH Bilduk mozio bateratua aurkeztu zuten, eta Ilundainek irakurri zuen testua batzarrean. Aho batez onartu zuten hori ere. Bestalde, etxez etxeko laguntza zerbitzuko hitzarmenaren luzapena urtero egin behar izaten da, eta aho batez onartu zuten hori ere.