Zestoako Udalak 2025. urtean herriko elkarteei eta entitateei diru laguntza emateko deialdia ireki du. "Gizartearen kohesioak, herritarren partaidetzak, eta, oro har, elkarte sare sendo, artikulatu eta antolatutako batek herrigintzan duen garrantziaz" jabetuta, udalak elkarteak eta haien jarduera "bultzatu" nahi ditu, eta horretarako, diru laguntza jasotzeko aukera eskaini die haiei. "Elkarte horien ekimenek zestoarren bizi kalitatea hobetzen laguntzen dute eta, askotan, herri erakundeek proposaturiko ekimenen osagarri izaten dira", azaldu du udalak.
Aipatutako diru laguntzen bidez, udalak elkarte eta entitate horiei zenbait eremutan "esku-hartzen lagundu" nahi die, hala nola kirolaren zein kulturaren sustapenean; irakaskuntzan kalitatea hobetzen; euskararen erabilera bultzatzen; herritarren parte-hartzea eta boluntarioak sustatzen; garatu gabeko herrialdeetan lankidetza proiektu solidarioak martxan jartzen; adinekoak beren interesen kudeaketan dinamizatzen eta inplikatzen; kohesio soziala sustatzen eta hobetzen; gizarte egoera ahuleko taldeak laguntzen; emakumeen eta gizonen berdintasuna eragiten eta sustatzen; gizarte elkarteen sustapenean; garapen iraunkorra, ingurumen hezkuntza eta ingurumen kontzientzia sortzen; eta enplegua sortzen.
Laguntza eskabideak udalak prestatutako ereduaren arabera egin beharko dira; elkarte edo entitate eskatzailearen ordezkariak edo erantzuleak bete beharko du eskabide eredua. Elektronikoki egiteko, berriz, erakundearen zerbitzu telematikoa erabili beharko da. Eskabideak hamabost laneguneko epean aurkeztu beharko dira, deialdia Gipuzkoako Aldizkari Ofizialean (GAO) argitaratu eta hurrengo egunetik kontatzen hasita. Hain justu, joan den astelehenean argitaratu zuten deialdia GAOn, eta elkarteek zein entitateek martxoaren 17ra arteko epea izango dute laguntza eskatzeko.
Hona hemen deialdiaren oinarriak irakurgai.