Zestoako udalbatzak ezohiko udalbatzarra egin zuen atzo, osteguna, eta, besteak beste, datorren urteko udal aurrekontua onartu zuten bilkuran, EH Bilduren aldeko zazpi botorekin eta EAJren kontrako hiru botorekin. Mikel Arregi Zestoako alkateak nabarmendu zuen egoerak baldintzatu duela aurrekontuak osatzeko prozesua, eta "zuhurtasun handiz" jokatu behar izan dutela. Izan ere, urrian jakin zen Espainiako Auzitegi Gorenak Zestoako Udalaren kontrako epaia berretsi zuela Ekainberri museoaren bueltako lanpostu baten auzian, eta behin betiko epaia izanda, erakundeak 523.000 euro inguruko kalte ordaina eman beharko ziola bide judizialera jo zuen herritarrari. Hori horrela, mailegu bat eskatu behar izan zuen Zestoako Udalak, eta alkatearen arabera, horrek murriztu du udalaren inbertsioetarako gaitasuna. "Normalean, urte batetik bestera, igo egiten da aurrekontuaren kopurua, baina gure kasuan, ezingo da hala izan". Hori horrela, zerbitzu orokorrak mantenduko dituzten arren, aurreikusitako inbertsioak ezingo direla egin jakinarazi zuen.
Aurrekontuen kopuru orokorra 7.563.016 eurokoa izango da. Alkateak adierazi zuenez, 2024 hasieran aurreikusi zuten kopuru berdintsua da, baina ondorengo inbertsioak kontuan izanda, 9.337.242 euroko kopuruarekin itxiko dute urtea. "Aurten urte hasieratik bukaerara bi milioi euroko aldea izan da, baina datorren urtean ez da horrelakorik izango", adierazi zuen. Udalak zorpetze mailan gora egin duela adierazi zuen Arregik, mailegua eskatu behar izan duelako. "2025a ekonomia saneatzeko erabiltzen baldin badugu, zerbitzu orokorrak mantenduta, 2026an inbertsioetarako marjina izango dugu".
Inbertsio nagusiak
2025eko gastu nagusia pertsonalari dagokiona izango dela azaldu zuen alkateak: 2.279.023 euro bideratuko dituzte horretara. Zerbitzu eta ondasunetara, berriz, 1.786.126 euro bideratuko dituzte, eta inbertsio errealetara, 1.691.739 euro.
Udalaren aurkako epaiaren harira, erakundeak defizita duela adierazi zuen Arregik, 127.521,64 eurokoa; "indize onargarriaren barruan" dago hori. "Hori kubritzeko gerakinik ez daukagu, baina otsaileko likidazioan ikusiko dugu kubritzeko moduan garen. Helburua izango litzateke defizit hori kubrituta bukatzea urtea", esan zuen alkateak.
Inbertsioei dagokienez, partidarik handiena GI-631 errepideko lanei dagokiona izango da. Lanen %40 2024an amaituko dute, eta falta den %60, berriz, 2025ean. Ondorioz, 2025eko inbertsiorik handiena izango da errepide horri dagokiona: 893.979 euroko bideratuko ditu udalak lan horietara, hain zuzen. Arlo horri lotuta, Errepide sailarekin hitzarmen bat dago eginda, eta lan horien zati bat finantzatua izango da. Alkateak adierazi zuen berez lanak ekainean amaitzea aurreikusten zutela, baina martxa onean doazenez, posible dela Aste Santu ingururako amaitzea. "Berri ona da hori", adierazi zuen.
Arroabeko igogailua izango da beste inbertsio garrantzitsua. Hori martxan jarri ahal izateko diru laguntza jasoko du udalak Eusko Jaurlaritzatik; lanen %60 ordaintzeko aukera emango du horrek. Lanen aurrekontua 523.000 euro ingurukoa da, eta diru laguntzari esker, Zestoako Udalak 295.240 euro ordaindu beharko ditu. Arroabeko irisgarritasunari begira, urrats garrantzitsutzat jotzen du udalak proiektu hori.
Kale Okerreko etxebizitzen eraisketa izango da udalaren beste inbertsio garrantzitsu bat 2025era begira. Iaz, udalak 11 etxebizitza eskuratu ostean, horiek eraistea izango da ondorengo lana. 150.000 euroko aurrekontua dute eraiste lanek. Helburua etorkizunean eremu horretan eta Correoseko eraikinaren eremuan 22 etxebizitza publiko eraikitzea da.
Baso politikari dagokionez, Gipuzkoako Foru Aldunditik jaso den diru laguntzari esker, Ertxin mendiko herri lurretan artadi landaketa egingo dute; hori da Zestoako Udalaren beste inbertsio nagusietako bat. Lan horiek ia %100ean diru laguntzarekin finantzatuko dituzte; izan ere, 70.000 euro inguruko diru laguntza jaso du udalak. Lanak abenduan hastekoak baziren ere, datorren urte hasieran hasiko dituzte azkenean.
Lanpostuak egonkortzeko bidean
Udal lanpostuei dagokiona izan zen udalbatzarrean landutako beste gaietako bat. Alkateak adierazi zuenez, Zestoan, beste leku askotan bezala, "behin-behinekotasun handia" egon da udalean hamarkada askotan. Dena den, haren arabera, une honetan Europako zuzentaraua betetzen du Zestoako Udalak; %8ko kopurua, hain zuzen ere. "Hala ere, bagenituen lanpostu batzuk oraindik plantilla organikotik kanpo, eta helburua izango litzateke aurrerantzean, enplegu planetakoak kenduta, gainontzeko lanpostu guztiak udaleko plantilla organikoak jasota edukitzea. Aurrerantzean, udal honek, birjartze tasak ahalbidetu orduko, lanpostu guztiak eskaintza publikora atera beharko lituzke", esan zuen.
Kasu zehatzetara jota, Arregik jakinarazi zuen une honetan bi lanpostu gehituko dituztela plantilla organikora. Batetik, gizarte langile bakarra dute plantillan, eta beste bat gehituko dute; eta, bestetik, arkitektoaren lanpostua sartuko dute plantillan. Aizarnazabalgo eta Mendaroko (Gipuzkoa) udalekin hitzartu du Zestoako Udalak arkitektoaren lanpostua plantillan txertatzearen kontua; langile horrek astean hiru egun Zestoan emango lituzke, eta bana Aizarnazabalen eta Mendaron.
Horrez gain, plantilla organikoan egondako zenbait lanpostu gaur-gaurkoz behin-behinekotasunean daudela esan zuen Arregik. Bi jubilazio izan dira azken bi urteotan: kirol suspertzailea 2023an erretiratu zen, eta liburuzaina 2024an. Bi postu horiek lan-legepeko kontratua dute gaur-gaurkoz, eta funtzionario postura aldatuko dituzte; ondoren, lehiaketa publikora aterako dituzte.
Era berean, hiru garbitzaile plantillan sartuta dauden arren, lanpostu horiek ere ahal denean lehiaketa publikora aterako dituztela esan zuen alkateak.
Lanpostuen aldaketak aho batez onartu zituzten udalbatzarrean; EH Bilduko zinegotziek nahiz EAJkoek alde bozkatu zuten.
Bestalde, udalbatzarreko hirugarren puntuan, GI-631 errepideko bulebarizazio lanetarako gasolindegiko bi partzela udalaren eskuetara pasatzea bozkatu zuten. Kasu horretan ere, udal talde guztietako zinegotziek lagapenaren aldeko botoa eman zuten.
EAJren "ezezko kritikoa"
Garikoitz Mendizabal EAJren bozeramaileak aurrekontuei "ezezko kritikoa" ematea erabaki zutela azaldu zuen. Haren arabera, ez da ematen "baldintzarik" aurrekontuak onartzeko. "Ez dira zenbakiak bakarrik onartzen, politika egiteko modua ere bai", esan zuen. 2024rako aurrekontuetan proposatutakoa "osotasunean ez" bete izana leporatu zion udal gobernuari hark. Horrez gain, Zestoako Gazte Asanbladarekin udalak lortutako akordioarekin ez zen ados azaldu Mendizabal. "Prezio altua ordaindu beharko du herriak. Kultur Etxea ez da haientzako leku egokia", adierazi zuen. Jeltzaleen arabera, estazio zaharra da Zestoako Gazte Asanbladarentzako "tokirik egokiena". Kultur Etxeak kultur eragileentzako espazioa izan behar du EAJren ustez, baina berrituta. "Zestoa oso atzean geratzen ari da kultur azpiegiturei dagokienez". Era berean, etorkizunerako kultur azpiegiturei heltzeko "asmo sendorik ez" duela leporatu zion udal gobernuari. "Gure ustez, alkate honek agintaldi hau pasatzea nahi du, nola edo hala", erantsi zuen.
Arregik erantzun zion berak plazaratutako "kezkak" parteka ditzakeela, baina "horien azalpenak ez". Alkateak onartu zuen hartutako konpromiso guztiak ez dituztela bete 2024an. "Ikuspegi kritiko batetik onartzen dut hori", esan zuen. Gazte Asanbladaren aferan, egoerari "duin" erantzun zaiola adierazi zuen alkateak, eta horrek ez duela kultur azpiegiturarik "hipotekatzen". Agintaldia pasatzen uzten ari ote den kontuan, berriz, zera erantzun zion Mendizabali: "Motxila nahikoa kargatuta daukat dagoeneko, eta ez dut uste gauzei pasatzen uzteagatik denik hori".